طريقة المفتول الفلسطينى

يعتبر المفتول من أرقى الاكلات الفلسطينية المعروفة وهو لذيذ ويصلح للعزايم

طبعا فى مناطق عنا فى فلسطين بحطو عليه قرع وبصراحة بقرع مابطلع لذيذ
خلينى احكيلكم طريقتنا وانشالله بتعجبكم
المقادير:
2دجاج مقطع أرباع منزوع الجلد
6حبات بصل كبار مقطع جوانح عريضه
3حبات بندوره مقطعه جوانح كبيره
حمص حب منقوع ليله كامله تقريبا كوب
ملعقة طعام صلصه
رشة كمون
شوية فلفل اسود
مكعبين ماجي
شوية كركم وملح طبعا حسب الكمية

هلأ بنحط جميع المكونات مع بعض وبنتركها على نار عادية لمدة نصف ساعة

هلا بنيجى للمفتول نفسه
المقادير
1كيلو مفتول فرنسي
1فلفل اخضر حار
ابصله صغيره مقطعه مكعبات
رشة ملح
رشة عين جراده(نوع من انواع البهار )ضروري للمفتول
2ملعقه كبيره سمنه
طبعا بنغسل المفتول غسلة بسيطة يعنى بنرش شوية ماء عليه مرة وحدة وبنكون حاطينه فى الوعاء
طبعا هذا الوعاء بكون مخرم من تحت يعنى فيك تقول مصفاية بس تكون كبيرةعشان يدخله البخار من الوعاء اللي تحته يعني اللي فيه الأيدام
لأن المفتول ماينطبخ الا على البخار غيرهيك يخرب
المهم بعد مارشينا المفتول نحطه على الوعاء الكبير
بعد 5دقايق نكون دقينا البصل والفلفل والعين جراده والملح في الهاون ونفتح الغطا عن المفتول ونحط عليه الخلطه اللي دقيناها والسمنه ونقلبهم مع بعض شوي ونسكر الغطا مره ثانيه ونتركهم يكملو طبخ فوق الأيدام(اليخنى) نص ساعه ثانيه وبعدين نغرفهم ونحط المفتول في الصحن ونرش عليه شوي من الأيدام(اليخنى) وبعدين بنحط اليخنى الى عملناه مع الدجاج فى زبدية عميقة ويقدم مع بعض

ملاحظه طبعا هذي المقادير تسوي كميه كبيره تقدري تسوي الكميه اللي تناسبك طبعا

وصحة وعافية
الصور هاى بدون اليخنى ماعرضت الصور كاملة لانو الصور الموجودة اغلبها تختلف عن طريقتنا

أنا ولا مرة سمعان في بس شكله طيب

انشالله بتجربو شى يوم بس بتحكيلى رايك

والله بصراحة صاحباتي كتييييييييييييييير بيحكولي عنو ونفسي أجربو
شكراً إلك بجربو وبقلك رأيي

عفوا